18 فبراير 2008



اللي يصير ما يدش العقل ومستحيل يقبله إنسان
أحد يقدر يفهمني شاللي يحصل في البلد
انطرح موضوع زيادة الرواتب بشكل سخيف قلنا ما يخالف
انطرح موضوع اسقاط القروض بشكل أسخف هم قلنا ما يخالف
انطرح موضوع الافتاءات عن عيد الحب قلنا ما يخالف
انطرح موضوع الاختلاط وما صاحبه من افتاءات صدعت الراس هم قلنا ما يخالف
لكن توصل الأمور إلى الطائفية!!!!!!

كل نار ممكن تنطفي إلا نار الطائفية

طول الفترة للي طافت مو قادر أكتب شي
مر علينا عيد الحب وأكرر عييييد الحب
وما قدرت أكتب وأنا اللي كلام الحب عندي مثل شربة الماي



كنت أشوف الحب بكل العيون
بعين طفل يلعب
بعين عيوز تشتري مَيوة البيت من فرع الخضار بالجمعية
بعين شايب يتحلطم ويحن على الكهربجي
بعين حبيبين يتمشون عالبحر ماسكين إيد بعض ويتهامسون
بعين طالبة مستعيلة على محاضرتها وخايفة من واحد لاحقها
بعين مراهق محتار أي قصة يقص شعره علشان تعجب البنات
بعين وحدة مو شايلتها الدنيا لأن الخميس ليلة عرسها
بعين مهندس مستانس لأنه انتهى من مشروعه
بعين طبيب فرحان لأنه عالج مريض
بعين طيار منتشي لأنه وصل بطيارته بأمان
بعين موظف مجتهد أنجز معاملة
بعين عضو مجلس أمة أنجز قانون يفيد البلد
بعين وزير واثق من نفسه يتخذ قراراته بثقة

لكن الحين وبكل صراحة ما أحس بهذا الجو
ولا حسيت بأي نبرة أو همسة حب حفزتني على الكتابة
حتى الألوان الحمرا اللي شفتها ما كانت تعبر لي عن الحب
صار الحب مجرد كلمة.. مجرد شكل .. مجرد شي ماله طعم ولا لون ولا روح.. ورود من البلاستك لا أكثر

ومن الأشياء اللي نرفزتني أكثر إن صديقي وأخو دنيتي لغته بدت تتغير
والمصيبة إن هو مو حاس بنفسه إن لغته تتغير لكن أنا كنت أحس بهذا التغير.. بدا يقول شوف ربعكم وربعنا وجماعتكم وجماعتنا (يقصد فيها مشايخ الدين من الطائفتين السنة والشيعة).. شوف ربعكم شيقولون عن الإمام الفلاني شوف ربعكم شيقولون عن فلان وعلان وشوف ردة فعل ربعنا
على فكرة صديقي، والله قلبي ما يطاوعني أقول صديقي وأسكت.. إلا بقول أخو دنيتي وأكثر من أخو.. هو شيعي عيمي ملتزم نوعا ما (يعني التزام عادي) وأنا سني نيدي علماني ليبرالي على الآخر
يقعد يسولف لي عن السقيفة وحادثة الباب والجمل وصفين والحق المسلوب
بالأخير أقول له..أدري وقريت عن كل الأحداث بالتاريخ الاسلامي



لكن الأمم المحترمة هي اللي تستفيد من التاريخ وخلافاته مو تعيش فيه وتتعايش معاه وتأجج صراعاته كأنه موجودة لي الحين
وأضرب له مثل بانقسام أوروبا في الحرب العالمية الثانية..باللي سواه هتلر والألمان ولا اللي سواه موسوليني في فرنسا وبريطانيا وباجي الدول؟ ومع ذلك شوف أوروبا الحين، سوق أوروبية مشتركة وعملة موحدة، يعني بعد أقل من ستين سنة قدروا يوحدون نفسهم وإحنا بعد أكثر من 1400 سنة مو عارفين نتفق على راي


المشكلة إن السنة والشيعة متفقين على المبادىء العامة لكنهم مختلفين على تفاصيل..ومصيبتهم إنهم مركزين على التفاصيل المختلفين عليها وناسين أو متناسين المبادىء اللي متفقين عليها وكل واحد بيثبت إن هو الصح!!


محد ينكر الظلم والقهر والبشاعة اللي تعرض لها الحسين بن علي وأهله، ولا أحد ينكر قوة وقدرة ومكانة علي بن إبي طالب ودوره وحكمته وفلسفته،، لكن هل هذا يخلينا نتصارع على التاريخ بدال لا نستفيد من أخطاءه!!


عموما .. الشي الجميل إن حوارنا دائما ينتهي بكلمة.. نشوفك على خير
وإن شاء الله دايما نلتقي على خير وتدوم أخوتنا وعمر التفاصيل ما تفرقنا.. والله لا يفرقنا

هذا من الأشياء اللي مخليتني طول الفترة اللي طافت ما أكتب شي.. لأني مو قادر أكتب.. وأحاول أطلع من هذي الأجواء.. أدور عن كل شي حلو ومفرح ومضحك حتى لو كان سخيف..ومن الأمور اللي خلتني أضحك شوي



في يوم من الأيام وأنا قاعد بالدوام، كنت محتاج أروح الحمام (عزكم الله) لأني كنت متأزم جدا وكل شوي تزداد الحسرة.. المهم دشيت الحمام وتوني مولع زقارتي ولا أسمع واحد يطق علي الباب فقلت له تفضل
طبعا ما جاني أي رد وسمعت باب الحمام اللي يمي ينصفق
وبعد دقيقة سمعت الباب اللي يمي يتبطل وشخص (عرفته من صوته) يتحلطم مع واحد ثاني ويقول له
المتحلطم: منو اللي بهالحمام
فأجابه الثاني: ما أدري.. ليش؟
المتحلطم: عيل أكو واحد تطق عليه الحمام يقول لك تفضل.. وين قاعدين

أنا ياتني الضحكة وبغيت أطلع له وأن بعز حسرتي وأقول له..اللي يبي يدش الحمام ما يطق الباب يدرعم على طول
واللي مو قافل الباب يتحمل مسؤولية عدم اقفاله الباب
لكن حسافة ما سويتها

لو كل واحد تحمل مسؤوليته بنفسه وما تدخل بشؤون غيره جان إحنا بألف خير.. ومحد درعم عليه

في النهاية عندي طلب أخير أو أمنية وهي على اللي يقدر وعنده وقت أن يزور دار الفنون ويحضر المعرض التشكيلي الخيري لدعم مشروع بيت عبدالله وإذا يقدر يشتري لوحة واحدة من اللوحات المعروضة
لأن الهدف هو جمع مبلغ لدعم بيت عبدالله
ومشروع بيت عبدالله هدفه أن يخصص للأطفال المرضى بالسرطان بيتا ليقدم لهم الاهتمام الأكبر بتوفير الاحتياجات الشخصية للطفل وعائلته في بيئة حميمية..وسيكون هذا البيت على شكل فيلا صغيرة يسكن فيها الأطفال الميئوس من علاج أمراضهم حيث يتلقون العلاج التلطيفي والعناية الخاصة ما قد يساعدهم على الشفاء ويجعل الوقت الذي يقضونه أكثر سعادة
والمعرض فيه حوالي 360 لوحة كلها مقاس واحد 20×30، وكل اللوحات بسعر خمسين دينار، يعني لو كل واحد اشترى لوحة وحدة صار إجمالي الريع تقريبا 18 ألف دينار
فعلا جهد جميل لمساعدة هذه الفئة من الأطفال وأتمنى أن لا يكون معرضا تشكيليا فقط بل يمتد إلى حفلات خيرية وعلى كل المستويات الموسيقية والمسرحية والتشكيلية وأن يخصص ريع هذه الحفلات للأعمال الإنسانية داخل الكويت وأكرر داااااخل الكويت
واللي ما يدل دار الفنون تراها خلف ستاربكس الكنيسة.. يعني يا رواد بومودورو وكاسبر وبيت سبعة وغزل المكان قريب اخذوا لكم طلة قبل لا تروحون أماكنكم المفضلة



وهذي نبذة من بعض اللوحات





































هناك 35 تعليقًا:

Someday يقول...

7mdellah 3l salamah!!!!! :D
I'm coming back again enshallah!!;p

sologa-bologa يقول...

someday

ما شاء الله شالتجاوب السريع
:)
انا لي الحين قاعد اجرب الالوان وكل شوي اغير
اتفاجأ بالتعليق
:)

Eva يقول...

انا بخلي السياسة على صوب طول اليوم مواضيع سياسية جرايد أهل ربع ...
كل عام و انت بخير .. هابي فلنتاين متأخر بس طوفها لنا : )
حتى مسجات الهابي فلنتاين قلت محد فاضي .. we need to spread LOVE


سعيدة بأن ارى لوحتي في أول صورة :)
Well u can c my blog heading و راح تعرف بالضبط اي وحدة ..


and people actualy came in the early morning today , i mean even before 9 .. its amazing , the whole concept is just great , different styles , kuwaiti artists and others from iran , yemen and other different countrys


البوست أوله يحسسنا ان خلاص ماكو أمل ...
but then , there is , some light.. when we look to the bright side

Eva يقول...

sorry , the first pic u posted i thought i saw the butterfly , the picture i got in my blog



soo again u have to guess;p no clues

اجار الدين كشمش يقول...

عاااااجل

"""""""""""""""""""""""
لاخواني الاحبه المدونين

تم سرقة اسمي

اجار الدين كشمش

من احد الحراميه ويبدو

من لهجته انه غير كويتي

ويدور بين المدونات

لاشعال الفتنه بيننا

وخااااصة اخواني الاحبه
في البلوغات
اللذين اختلف معهم

بالراي واللذي لايفسد لمحبتنا للكويت وودها

قضيه
""""""""""""""
اهيب بمن يريد ان يطفأ

الفتنه ...ان ينشر

وشكرا للاخ مطقوق الشاب في عمره والرائع في عقله

وشكرا ل احلى مهندسه
ولجميع من كشف اللص

الفتني

ونقول للص وايد عليك
اجار سطوح الكويت المتماسكه ..بحب الكويت
""""""""""""""""""""
فمالله
من اراد التأكد بروفايلي

غير بروفايله

Barrak يقول...

اولا ترى ولهت على كتاباتك


ثانيا
اللي يصير شي طبيعي حبيبي لاننا مو دولة فكر مو بعهد نشوف فيه مسرحية دقة الساعه مو عهد حرم سعادة الوزير
احنا بعهد التفاهه
شوف اللي وياك بالصف اتفه واحد واملق واحد تلقاه وصل والمؤدبين وخفاف الدم تلقاهم ببيوتهم
لان بالسابق كانوا يهتمون ببناء الانسان اما الان يهتمون ببناء جسر او لفة فوق تحت لفريج
بالنسبة للطائفيه يعني انت مو متوقع هالشي شاللي باجي ماصار بس ودي اسأل سؤال واحد لو بدوله خليجيه اخرى اا واحد فكر يسوي حفل تأبين مجرد تفكير شنو راح يصير
كل شي بالحياة حاليا يتصف بالعنف عنف بالطرح الطائفي وعنف برد هذا الطرح وعنف بتعليق احد الوزراء وعنف بالشارع وعنف وعنف الخ

وايد عجبتني هالجمله بعين شايب يتحلطم ويحن على الكهربجي

بعد اذنك بالنسبه للمعرض التشكيلي الى اي تارخ سيستمر هذا المعرض

اخيرا عندي طلب
لا مو طلب مجرد راي
اخوي سولوجا بما ان انت مالك خلق تكتب ولا انا وناس وايد بعد ليش مانسوي مسرحيه او قصه او اي عمل فني للناس اللي تحب بساطة الحب
بما انك كتبت هالجمله
بعين وحدة مو شايلتها الدنيا لأن الخميس ليلة عرسها

وبما اني واثق انك فنان وايد يستهويني فنه
شرايك نعمل عمل فني مشترك
على سبيل المثال سولوجا يرسم ملامح القصه وينسج موقف وبراك يترجم هالموقف لشعر وفلان يرسم لوحه تصور احداث الموضوع وفلانه تتحفنا بسرد تاريخي لموضوع ما

باختصار نسوي عمل فني وهو عباره عن بوست مشترك ينشر عند اصحاب المدونات المشاركه بيوم واحد ويكون نتاج عمل مشترك بين الناس اللي مثلي ومثلك يبون يحتفلون بعيد الحب ويبون يشرحون قضيتهم واحساسهم بصوره عميقه
ليش مانرسم الحب بكل عيون بس بتصورنا

شرايك

lawyer يقول...

موضوعك يحر و يحرق القلب صج
حساااااااافه عليج يالكويت

الي متنجنسييييييييييين في الخمسينات طلع ولائهم برا عيل الي الكواوله الي تونا مجنسينهم بعد 100 سنه شنو بسووووووووووون !!


كلا بصووووووووووم و ماني قادره اسكت من الضحك على موقف الحمام

يوم قلت تفضل
قلت انا بقلبي هاااااااااااااااو
سليييييييقا شششششتفضل انت بعد !!

حمااااااااام حماااااااام هذااااااااا

Shaima'a Alkandari يقول...

اخوي الغالي ولهنا عليك وعلى مدونتك

الحب الحين صار كلمه عاديه مثل شلونك وشخبارك وصارت تستخدم عند كل من هب ودب

فاحلى شي انك تعيش الحب وتتلذذ فيه مثل ماتعودت ومثل مارسمته في بالك وفكرك وخل الصوره اللى في راسك تثبت وماتتلخبط كلش

الحين الحب صار حب مصالح وحب اختلاس وحب الانانيه وحب امتلاك الغير وانجازات الغير بعد

وسالفه السنه والشيعه والاحداث اللى صارت حده عوار قلب

والله يديم صداقتك مع اخو دنيتك


وسالفتك مالت تفضل حدها ضحكتنى :)
زين ماقلت حياك اخذ زقاره عالماشي
ولايكون انت موقافل الباب @@

وبالنسبه للمعرض فيعتبر عمل جميل وكافي هدفه الواضح بس لي متى بيكون

وريح بالك ياخوووووووي وعيش يومك بحب

mantovani يقول...

التهديد الضمني اللي في عنوان مدونتك

ماراح يطوف علي ... !!!


----

تحياتي لك و اتمنى نك ما توقف و لا يوم

مانتوفاني

S-Q8 يقول...

والله توني قاعدة افكر بوضوع الطائفية هذا
للاسف مع ان كل عاقل كويتي سواء سني او شيعي تنكر لموقف النائبين و الاقلية من الشيعة الا ان نار الطائفية بدت تتصاعد و انشحن الجو
الحين بس قاعدة اسمع انتو يالشيعة و انتو يالسنة
و بعدين النائبين اغلطو فعلا.. بس كراي شخصي ماله داعي يعطون الموضوع اكبر من حقه و يضخمونه
لان شوي شوي النتيجة بتصير حرب طائفية
المفروض يوازنون الامور و ما يخلون غلطة اثنين او اقلية تفرق شعب كامل
الله يصلح الحال
يعني لو كل واحد استغل طاقته الزايدة هذه ان يروح ينجز و يخترع شي او يرفع اسم ديرته بشي او يسوي خير يرسم فيه البسمة على وجه غيره مو وايد احسن
سوري على القرقة بس وايد متأثرة من هالموضوع

sologa-bologa يقول...

eva

هابي فالنتاين
وأعياد حب سعيدة على طول السنة
:)

استانست لما سمعت إن كل اللوحات انباعت
وبفترة قياسية

والأمل دايما موجود
وماكو ليل يدوم

والله لأن اللوحات كانت صغيرة فكانت الصور
اللي خذيتها تشتمل على أكثر من لوحة

بس الأهم يعطيكم على العافية
على المشاركة الجميلة في هذا المعرض الخيري
:)




----------------------


اجار الدين كشمش

أن أقول تعليقاتك في بعض المدونات
كانت غريبة
خبري فيك ما تعلق بهذا الأسلوب البذي
حتى مع الأشخاص اللي تختلف معاهم

معلش مرة ثانية دير بالك
والله يستر لا يجينا الدور


-------------------------


barrak

انت استاذي وصديقي
اقتراحاتك أوامر

بالعكس فكرة وايد حلوة
وأنا معاك من الحين


-------------------------

lawyer

من قال له يطق الباب علي!!

بعدين أنا قافل الباب يعني مطمن إنه ما يقدر يدرعم
:)


-----------------------------


shaima'a alkandari

والله احنا اللي ولهانين
وادري انا مقصر في التعليق في مدونتكم
بس كل هذا بسبب المزاج اللي مو أوكيه

أما سالفة السنة والشيعة
أقول الله لا يفرقنا
بالنهاية كلنا كويتيين وماكو فرق بينا

أما سالفة تفضل
لا تخافين أنا قافل الباب
يعني مطمن إنه ما يقدر يدرعم
لا ماكنت بعزمه على زقارة لأن ماكان عندي إلا زقارة وحدة
:p


-----------------------


mantovani

حياك الله عزيزي
وانت الصاج يا خوي
مو تهديد إلا تحذير ضمني
من الفيل اللي كل يوم يكبر

وتسلم حبيبي


----------------------------


ni3na3ah

الله يستر بسرته
المصيبة إن الطائفية نارها ما تنطفي
وشرارة صغيرة ممكن تشبها وتشعللها

بس إن شاء الله متفائل
إن الكويتيين أكبر من كل طائفيةومن أي فتنة
بس خل يشغلون عقولهم وما ينجرفون ورا عاطفتهم
خصوصا العاطفة الدينية والمذهبية







ودام الجميع بحب وود

Someday يقول...

Ytarawaly el tarkyyz only 3ala el negative stuff would eventually cloud your mind and weight you down!!! Don’t let it get the best out of you!!! If that happened then how can you fight it?!?!?!?

This may sound silly but it’s what I do! I enjoy simple nature made miracles, like seeing a rainbow, once every decade in the dear country of ours, but that’s what makes it precious!!!! Full moon! Once a month!! Given a clear sky!!! Flying folk of birds organized in a perfect Arabic 8! Unknown time!!
Let little rays sneak in! and let the shine flow!!

vancouver يقول...

سلوقا

الطائفية موجووووده من زمان
بس داخل البيوت

الحين بدت تطلع بره البيوت والشوارع عشان جذيه انته متفاجئ

بعدين الصداقه سهله جدا
بين ليبرالي وملتزم
يعني مو شيء غريب
بس صعبه او مستحيله
بين ملتزم وملتزم
من النقيضين

ما ادري اذا فاهمني
:\

قواك الله على مجهودك بخصوص بيت عبدالله
----


وانا اييد اقتراح براك
:)))

---

سؤال
لو بالخطا
لو احتمال واحد بالالف
انك تكون ناسي
تقفل الباب

شتسوه عليك الفشله
والا عادي عندك
:pppp

vancouver يقول...

pppp:

هذا قصدي


مو هذا
:PPPP

hehehehe

غير معرف يقول...

عزيزي سلوقا لن اتطرق للتعليق على الامور السياسية اعلم انك تعرف وجهة نظري بها... بالنسبة للمعرض فعلا مجهود يشكر عليه و يستاهل العنوة...ولكن لي وجهة نظر و ما اكثر وجهات النظر عندي...:)
لا ارى ما الهدف من تجميع اطفال في عمر الزهور في بيت واحد لتنفيذ مطالبهم قبل ان تقع ارادة الله بأبادتهم واحد تلو الاخر ... لا اعلم ما هو شعور الطفل حين يفقد زملاءه الواحد تلو الآخر!!!!! كان الاجدر ان يقدموا يد العون لهم وهم بين اسرتهم و محيطهم و تلبية كافة امانيهم دون تجميعهم في مكان واحد .... كيف لام ان تتخيل ابنها في بيت كهذا ؟؟
شبيه بمعتقل كل رواده محكوم عليهم بالاعدام

أأسف على الاطالة وجه نظر شخصية
دمت بحب و صحة و خير و امن

Nora يقول...

في نظرية تقول ..
لابد من دمار شامل حتى يتم البناء من جديد ..
!!

اخاف منها حيـــل ...

ساعات اقول .. لا لا نظرية المشخال !!
اللي صاير كان يعور القلب ..
تطور الى .. واااكويتااااااه @@


اخو دنيتك .. و انت .. تمثلون علاقة كويتية طبيعية ..

انا مع الحوار المفتوح بكل المواضيع ..
لكن .. اكره الاتهام و التعميم ..

و صاير الوضع .. تحذف صخر .. يا تؤمن بما اقول .. يا انتوا و جماعتكم و سوالفكم .. اموت و اعرف كم كم منهم ؟؟!!



الحين .. عرفنا شكثر انت ذرب و راعي واجب .. يطق الباب تقول تفضل ..
صج صج دام فضلك ...


انا كنت احس بهالخصلة فيك بس ما هقيتها لهدرجة صراحة :P

عودة ميمونة .. اسعدت قلوبنا رغم الحوسة :)

الزين يقول...

عودة موفقه يالشيخ

وبما ان كلام الحب اسهل شي عندك
ابي اطلبك طلب

ابي بوست فيه رومانسية
ذبحتونا سياسة وسوالف

عند جد كنا فاقدينك

قرت عينا

صبا يقول...

مسااااااء الحب :)
قرت عينا
مابغيت
ولهناعليك ؛-)
واما عن الحب فاقدينا من زمان

وانشالله كل حياتك فلنتاين يالغالي وبيعنا بالسوق ولا يضيق خلقك

تحياتي من قلب

AseeL يقول...

هذا تأثير البلورة :)

ابتسم.. والصق ابتسامتك نجمة على جدران السمـاء

..ودعها تضــيء حلكتك
..وترسم الأمل في قلبك

افتح مزلاجه وشرع ابوابه وانظر من حولك..
فالحب طفل صغير ينتظر على اعتابه

sologa-bologa يقول...

some day

مثل ما يقولون
لازم في ضوء في آخر النفق

فيني شوية تفاؤل بس مو على الطريقة
الرومانسية اللي ذكرتيها
:)

وشكرا على النصيحة




------------------------



vancouver


يعني الأقطاب المتشابهة تتنافر
والأقطاب المختلفة تتجاذب
:)

اللي يذكر أيام الثمانينات خصوصا
بعد تفجيرات المقاهي الشعبية وموكب الأمير
وأحداث يناير سنة سبعة وثمانين
وصولا إلى ما قبل الغزو والطائفية اللي
وصلت ذروتها يخاف من أي إثارة للطائفية

--

ليش الاحتمال واحد بالألف
صار معاي نفس الموقف
بس مو لأني ناسي لأن أساس الباب ما فيه قفل
واضطريت أسد الباب بريولي
كانت قعدة مو مريحة
وحاول واحد يبطل الباب بس ما قلت له تفضل
:))


------------------------------


9ahba'a

كلامكم صحيح ووجهة نظر
وميخالف كثروا وجهات النظر علشان تعم الفائدة

أعتقد إن الفكرة الرئيسية زرع روح التبرع لمشروعات انسانية داخل الكويت
ويمكن القائمين عندهم وجهة نظر معينة

الله يكون بعون الأطفال المرضى والكبار المرضى
ويكون بعون أهلهم


----------------------


a7la eng

ما أعتقد في انفجار أقوى وأكبر من انفجار الغزو
!!!

بس الظاهر ناس وايد ما تعلمت منه



بس اشرايج بذرابتي وكرمي الجم
:p

والله يستر على الوضع ويبعد التعصب الأعمى



------------------------

الزين

انتي ما تطلبين إنتي تامرين أمر
:)

انا ما احب السياسة بس الوضع صار أكبر
من السياسة..وصل الى الطرح الطائفي
وهذا أكبر من السياسة وأخطر

والله أنا اللي قرت عيني بوجودكم ودعمكم الدائم واللا محدود
:)



-------------------------------


صبا

ما تفقدين غالي
والحمدلله على السلامة

وما عاش اللي يبيعكم بالسوق

وإن شاء الله حياتنا كلها حب وفالنتاين
وسعادة مرتاحين البال والخاطر
:)



---------------------------


aseel

عاد أنا دفعت دولار علشان البلورة
:)

حلكتي يبيلها غسيل وتشحيم علشان تنور وتضيء
بس أوعدكم أغسلها هاليومين
:p

من كثر ما أنا فاتح مزلاج قلبي
أمشي وأقول للناس تفضلوا
:P





ودام الجميع بحب وود

بو حمود يقول...
أزال المؤلف هذا التعليق.
بو حمود يقول...

من بادى الزمن والدنيا فيها ارناق واشكال


كلن له وجهة نظر و محد يبى يحس بالثانى
اش كال


الهداوة والتسامح اكيد بيننا ممكن تحل
الاشكال


لابد نطوف لا نقول هذا ما عنده وذاك عنده


ما يخرب الا التزمت والذى مربوط يجره
عنده (عناده)


اللى يكبر راسه يربح لا نتكلم عن ذاك
وعن ذا


ترس المشاكل والمشكل تمشكلنا ما يحل
الاشكال



تحياتى

ومبروك العوده للكتابه

وعقبالنا يا رب

:)

يا زين الحب يبيله سفر

بعيد عن الدندره

فقط خضره وجمال وبحر او نهر او بحيره

عزيزى بو عزوز كل اللى تشوفه

زوبعه فى فنجان

ولا يسوى تكبير المسائل واعطاءها اهمية

بعض الاشياء عدم التطرق لها ابلغ

فنحن بتدخلنا نكون حققنا مراد من

اراد خلق البلابل

اخوك بو حمود

7osen يقول...

السلام عليكم

شلونك وشخبارك

الحمدلله على السلامه وزين إنك نزلت بوست يديد لأنا واايد أشتقنا حق بوستاتك

وتبي الصج أنا توني أشوف هالبوست مع إني على طول أجيك مادري ليش

عموماً كلامك والله صحيح
مادري شفيها الناس
والله صج

يعني الواحد ينتظر الزله على الثاني ؟؟
ولا شنو بالظبط ؟

إللى يصير شي مخيف الصراحه مانملك إلا إنا نقول حسبنا الله ونعم الوكيل

والله يهدي النفوس ويجمعها على الحب والخير والسلام إن شاءالله

****
ضحكتني على سالفة الحمام والله ضحكت على تفضل
صراحة لو أنا جان دشيت
هههههه


مشكور وايد على هاللفته والمبادره الطيبه

***
وأخيرا نسيت أقولك شصار على موعدنا
ترى منتظر منك الأو كي

أتمنالك كل الخير
وأجمل تحية

enter-q8 يقول...

هم لا تستغرب انت مو بالكويت اللي قبل
كل شي تغيير
حتى الولاء و الوطنية تغيرت مقاييسها
للأسف

الحارث بن همّام يقول...

انا من زمان اقرا هالمدوة .. بس اليوم اول مرة اعلق


كلامك مسمار في لوح.. شكرا لك

sologa-bologa يقول...

بوحمود

هلا وغلا بالحبيب
شالغيبة يا خوي
!!

يسلمك ويطول عمرك
يالله شد حيلك وأنا ناطرك من زمان
وعلى قولة الشاعر مع بعض التحريف من غير تصريف

أمر على مدونتك وكلّي حاجة
لعلي أقرا لك زهيريةً جديدة

وصح لسانك على الزهيرية الطيبة
وعدل كلامك
ومثل ما تفضلت المفروض ما نعطي المسألة أكبر من حجمها
لكن الخوف من الناس إنها تتأثر
وتتكرر أحداث الثمانينات الله لا يعودها

وتمنياتي لك بدوام الصحة والعافية
وعلى قولتك

يبيله حب مع سفرة
:)


------------------------------


7osen

حبيبي تسلم لي بس والله انا مستحي منك

كل ما اشوف لي يوم تطلع لي شغلات ما أدري من وين
:(

--
يعني لو قايل لك تفضل جان دشيت
:)
عاد لو داش يا خلاف اشبتشوف!!
واحد قاعد يدخن
:p

وتحياتي


---------------------



enter-q8

حياك الله يا خوي

مابي الكويت ترجع نفس قبل
لأن اللي يروح ما يرجع
بس على الأقل نستفيد من الدروس والمصايب اللي مرينا فيها

اشناطرين ايينا بعد

خفس
!!!

وتحياتي


---------------------


الحارث بن همام

حياك الله اخوي
ويشرفني مرورك وتعليقك
والحال من بعضه بس انت احسن مني
على الأقل علقت
:)

خلنا نختلف في كل القضايا
بالعكس الاختلاف شي طبيعي
بس لا نوصل للخلاف الطائفي
هذا الشي اللي مو طبيعي وماله إدوا


وشاكر لك مرورك وتعليقك الكريم





ودام الجميع بحب وود

NewMe يقول...

عزيزي يقولون اليوم الأربعين
وأنا راسي بينفجر من ازعاج جارنا
اللي المفروض حزين
بس قرر يشاركنا احزانه
ويحط سبيكرات
ويطبخ اهو واهله بنص الشارع
لطالما كانت لي نظرة محايدة بين السنة والشيعة
وذلك بحكم أني ...
ولكن عندما تتعدى حريات الاخرين الدينية
لتطال حريتي
فأقول كفى وعيب!
ثم لماذا لم يعد الناس يحترمون عقولنا
ما افهمه ان الحزن لا يمكن ان يترجم هكذا ابدا
وما يحصل هذه الايام من استعراضات
ما هي الا طائفية مستعرة
تاخذ شكل مغاير في التجني على الآخر
ولا اعفي اهل السنة
من ازعاجات منابرهم ايضا
عندما يتحول الدين إلى مظاهر ومظاهرات
ويختلط الحابل بالنابل
كيف لنا ان نحب ونحن لا ننعم بقلوب سمحة
ليحبوا الله والحسين وابوبكر
بس بهدوء
ما له داعي انعيش باستنفار
ترى الحب بهدوء
له طعم
آخر
ولكنهم لا يعلمون
اشتقت لكتاباتك الدافئة
أكيده أنها ضائعة وسط زحمة ما يجري من أحداث
قليلا من الهدوء
وستجدها
أظل في انتظارك
دمت بحب
تحياتي

Shaima'a Alkandari يقول...

ويييه

ياخوي شنو مقصر ومومقصر

يبه عادي كافي انى اسير عليك بمدونتك وادري انك بخير وموجوود معانا واقرا حروفك النابضه

magnoonah يقول...

قبل كل شي ابي اقوله

ابس اسالك في احد يقول لاحد تفضل بالحمام؟؟؟؟؟؟؟

صج صج لا حول ولا قوة الا بالله

________________________
الحمدلله على السلامه تو ما نورت المدونه


الكويت ما عليها الا العافيه ان شاء الله يعني ازمه وتعدي

اما بيت عبدالله انا مو ضده بس يا صاحب السمو جربت تتعرف على واحد من هاليهال او حتى تشوف حالته ترى مسألة نحطهم في بيت ونسكر عليهم شي صعب واقل شي ممكن نسويه لهم انه ننر لهم بعين العافيه ونحاول نتاقلم مع وضعهم ولا نبين لهم انه بعدهم عن الموت خطوه ترى الاعمار بيد الله

تدري اغلبهم اذكياء ومرحين لدرجه انه دخولهم لقلبك راح يكون باحساس من سرعته ماراح تعرف متى كبر يعني يكفي بس تاخذ وتعطي معاهم عشان تحبهم

وتحياتي

sologa-bologa يقول...

newme

مصيبة المصائب
أن نعيش التاريخ بخلافاته وكأن التاريخ
صفحة لن تنطوي أبدا

إذا كان من بد، فيجب أخذ العبرة من التاريخ
لا احياءه بطريقة متعصبة




-----------------------


shaima'a alkandari

دائما كلماتكم بلسم
:)



---------------------


صاحبة المعالي والرفعة
magnoonah

في ما يخص موضوع تفضل
حبيت أقول إن في "مجانين" وايد بالكون

وأرجع وأقول
ليش يطق الباب علي
!!!

---

الكويت إن شاء الله دايما بخير



أما موضوع بيت عبدالله
كلامج صحيح ومافيه غلط
لكن هذا اجتهاد من بعض الطيبين اللي ما نشكك بنواياهم

لذلك اذا عندج اقتراحات ورأي تقدرين توصلينه لهم..وأكيد بيسمعون

اللي حبيته بالموضوع الفكرة العامة لاشراك الناس بالأعمال الخيرية داخل الكويت وبأسلوب جديد
يعني التبرع لعمل خيري عن طريق معرض فني
أو أمسية موسيقية أو حتى مسرحية يخصص ريعها للأعمال الخيرية دااااااخل الكويت







ودام الجميع بحب وود

Mok يقول...

احسنت

White Wings يقول...

كيف الأحوال؟
سمعت أن مدخول المعرض كان ممتاز، نجاحه اشارة ممتازة، وبيت عبدالله يكاد يكون أحد المشاريع القليلة التي تستاهل
والبلد ولعت، شنسوي؟؟

sologa-bologa يقول...

mok

جزاك الله خير




--------------------


white wings

لوحات المعرض كلها انباعت بأقل من 24 ساعة
والله صج ليش ما تتكرر هالأنشطة
أولا منها عمل خيري
وثانيا تظهر ابداعات المبدعين
وجان زين يسوون حفل موسيقي خيري
نفس ما سووا ذيج السنة لدعم لبنان
وغنى فيها شربل روحانا
منها استمتعنا بالحفل ومنها تبرعنا لدعم لبنان

أما شنسوي في وضع البلد.. فأقول نسوي حفلة خيرية





ودمتما بحب وود

غير معرف يقول...

الله يبعدها عنا

Aldenya يقول...

:>

بوستك بدايته انت معصب
وبعدين تلطيف
وبعدين طيبة
عاد تدري
اليوم رحت معرض بكلية الهندسة
وباجر آخر يوم
كانوا مشاركين اهناك
اللجنة التنفيذية لبيت عبدالله
وكانوا محتاج متطوعين للتعريف عنهم
واهما بصراحة في أشد الحاجة لنا
للدعم
,,
ممكن أسألك ؟
ولك حرية الإجابة
وسؤالي هو
ليش إخترت العلمانية كــ تيار تتبع له ؟
:>