مغلق للتحسينات الفكرية أو للتخريبات
حتى إشعار آخر أو حتى من غير إشعارات
وبعد ما انتهى موضوع طرح الثقة والندوات
والتجمعات والطعنات وقذائف القاذفات
والفتاوى والإفتاءات
والله يستر مما هو آت
مالنا غير قراءة هذه المختارات

من هذه الأبيات
للمرحوم الشاعر الدكتور عبدالله العتيبي
من مسرحية دقت الساعة
طبعا أنا ناقل النص عن المسرحية كامل مع الأغاني

لكن اخترت بعض الأبيات

هذي البلد يا رفاقة
كانت كما النهر جاري .. كانت كما البدر ساري
يسهر كي يسعد الناس
لكن دوي المطامع .. طبل يسد المسامع
يقتل بها كل إحساس
المال عبد وسيد .. والناس رافض مؤيد
وما بين هذا وهذا
يا سادتي صار ما صار .. صلوا علي سيد الأخيار

يا سادتي صدقوني .. الدار مثل العيوني
شالتكم صغار وكبار.. شيلوها يوم الزمن دار

الحل حلج ارقصي يا خيبة .. واخذي من الديرة زمنها الجاي
خلي أملها ينكسر يا خيبة .. ويصير سهم بيد الرماي
حطي على درب الندم خطوتها .. بيعي بأسواق الظلام قمرتها
رزي على جبال الوهم رايتها … صيري لها نهامها وديرتها

يحق له يبخر السوق
عند اختلال الموازين
ما ينعرف تحت من فوق
غيمة ذهب وأمطرت له .. قومة بخت ورقصت له
صار البخت من عبيده .. يجيب له ما يريده
لكن وهو يرتفع لي فوق .. المال عمه وسيده

أبو جهل في التجارة .. اللي خذاها شطارة
لا باس ضحك وعيارة.. والله عليم بالأسرار
جاته وهو ما عرفها .. تيار جهله جرفها
جنحان طيره نتفها.. وبيسبله عقب ما طار

المال عبدك وسيدك .. قرر مصيرك بيدك
يا تصير عبده وتنهان.. يا تصير سيده وتنصان
المال له ألف سلطان .. على النفوس الضعيفة
المال رحمة وإحسان.. على النفوس العفيفة


يا دارنا سود الغيوم انزاحت.. يوم الغشاوة عن عيونج راحت
يا دارنا يا أم الخطاوي الخضرا.. ياللي على صدرج تنام القمرة
ياللي على الدنيا ربيع أفضالج.. لبسي عباتج وافزعي لعيالج
شوفي الكسيرة والعرب منضامة.. جن الليالي رجعت هدامة
شوفي بسوق المال صارت طبعة.. صار الرفيج يشاكي أهله وربعه
بالج تقولين الزمان وطبعه .. قولي عدوج كبر المحيامة

السوق ركس .. يوم انقطع منه النفس .. السوق ركس
والكل غرق .. والشيك بيدينه ورق .. السوق ركس


لما الأمور اتخالط … والدنيا فوضى امخامط
تكثر سكيك المزامط
ويجيج مليون مفتي .. في كل موضوع يفتي
يحل لج كل إشكال .. ويغني للأزمة موال

صارت مشاكل بلدنا.. أزمة وحل وقوانين
وراها حل وقوانين
ونضيع في كل ساعة .. ما بين صج وإشاعة
ونضيع بين القوانين .. راعي البلد صج مسكين

وهي بصريح العبارة واختصار القول
قصة جماعة صغيرة همها الثروة
والشيك قانونها في البيعة والشروة
يمكن تصير مدته شهرين حول
يمكن تطول مدته تطول عرض وطول
مدام هم به رضوا حبل المودة يطول


مرت علينا الليالي والزمن دوار
جن الليالي وقفت عند الذي قد صار
جن الزمن ما دار يا ضحكة الأقدار
جن البلاد عرفت كل اللي داخلها
جن البلاد عزلت صكت مداخلها
يمكن دخل في سماها طائر اللعنة
اللي سكن معنا ونحسبه صاحبنا
الأزمة صارت قضية شدت الأنظار
الأزمة صارت قضية شتت الأفكار
عن لعبة الأشرار وأطماعهم بالدار


جونا بكل المبادئ الطيبة والردية
لبسوا عباة المطوع راية الثوري
دشوا في كل الجرايد .. والجامعة والمساجد
وابن البلد صار محتار .. ما بين تيار وتيار
إحنا اللي كنا جماعة صرنا بدايد بدايد !!
يا دارنا جاج الجراد اللي انطرد من كل بلاد
صرنا نتخبط يا عباد جنة العيون امعصبة

كانت بلدنا صغيرة .. لكن كبيرة بأهلها
كانت بلدنا فقيرة .. لكن غنية بأهلها
أهلها عيال بطنها .. أهل الخصال الأصيلة
اللي شربوا من لبنها.. كل المعاني الجميلة

واللي بنى السور شاهد .. كانوا جماعة في واحد
الدين والرب واحد … كانوا جسد قلبه واحد
اسمه الديرة
والديرة كانت معاهم بالسفر دَيرة
ما قالوا للي طبع بندوس تريجه
كانوا خيوط الصبر اللي انفرط حيجه
كانوا عناد الليالي .. ما يرخصون كل غالي
كانوا خطاوي ثجيلة .. تسحق أثر كل حية
مثل الشعوب الأصيلة .. ما تهمها الطائفية


يا ساكنين البلد .. يا أهل هالديرة
بحر الخطر بالبلد.. سمعوا دراديره
اصحوا .. تراها طلعت من جحرها كل حية
اصحوا.. تراها أسفرت كل النوايا الخفية
اصحوا.. تراكم دخلتوا في كل شي مو طبيعي
اصحوا .. وإلا افترقتوا ما بين سني وشيعي


شمس الربيع غربت .. جتكم شموس القيظ
حبوا الوطن والوطن .. شمسية وقت القيظ
أيام عسر الدهر .. كانت بلدكم غنية
كانت تطفي الخطر .. في صبرها والحمية
واللي انكسر في البحر .. ترفاه جف سخية
شاللي جرا يا بلدنا .. طبعج تحول مو مثل الأول
شاللي جرا يا دار
يمكن أيادي خفية .. خلت عيالج مطية
تمشي ورا كل تيار..شاللي جرا يا دار

شيلي الشحم عن جتوفج .. يا دار صفي صفوفج
خلي عيالج تحوفج
واسمعي النهام
اللي سهر ما نام
إلا على سيفج
جاج الخطر من يمينج .. جاج الخطر من يسارج
قظبي بيدينج وزارج .. وانهمي يا مال
يا تجيج الرفاقة .. بقلوب تقطر شفاقة
كل القلوب اتلاقى .. تتحد في الحال
كل البلاد اتواعد .. مثل الغيوم اتراعد
وعند الزمام اتساعد .. لي نهم يا مال


ويرجع الكل في واحد .. الدين والرب واحد
ونغني في صوت واحد

حنا هل الدار أولها وتاليها
حنا هل الدار شوكة بريل واطيها
حنا سراج اللي ضاعوا .. نشتري يوم باعوا

واللي يبيع الوطن .. مو مثل شاريها