11 ديسمبر 2007

مقولات من المسلسلات


إدواي مو بالعصيدة باللي سوا العصيدة
خالد المثلاج

المرة (المرأة) من غير ريال مثل الحداد من غير فحم
اقحطة بن نافل

ليش ما تشتغلون بالنعل مثل خالكم اقحطة
فضة بنت نافل

أنا أقول صالح سِبـِعْ .. باع الثلج وشرا سبال
خالد المثلاج

صويلح على ثوارته نافعنا
خالد المثلاج

كل شيء ممكن طالما فيه عزيمة طالما فيه إرادة كل شيء ممكن
فؤاد ولد سعيد باشا

شيل صورة كلب حط صورة خروف
حسين بن عاقول

لي متى بس لي متى
لي متى حجينا فوق السطوحي
ليش مو بالدار واحنا بروحي
سعد بن عاقول

المرقاب لنا قبل لا يسمونها المرقاب
حسين بن عاقول

فاصل غنائي مع أغنية البارع

يما يا البارع قوية العين
تبيلها ريلين
واحد بو ربية والثاني ربيتين


عودة إلى المقولات

إنت اليوم محسوب من أحد أعضاء مجلس إدارة بني عبس لا من موظفيها..إي والله إي والله
الملك زهير

خليتي اللي لج كان ذخر
خل ينفعج ولد الفقر
وتعالوا بلنج بعد
العيدروسي

ولد خالة عمة يدتج.. ست مرات يصيدونه بخيطان يسوي سحر الكلب
مجبل خال حرم سعادة الوزير

كل ليلة على هالحال ديد لي وديد لسارة
وساعات بيني وبينك يا مجبل أنا وسارة نتغافل أمي ونتبادل ديود
ابراهيم فيزا أخو حرم سعادة الوزير من الرضاع

هذا كفو باجر يحط ريل على ريل ويقول أنا نيسب عيد جبر أبو الحصاني..عيل يقول لي نسيت أصلك وفصلك يا عيد
عيد جبر أبو الحصاني

كنتوا لي القدو وأنا التتن..كنتوا لي الجدر وأنا الباجيلا
سند بن هامان بن فرعون

بس سمعوا بالويسكي سكتوا.. شوف أم مشعل ما زاد من بطلها شي
سند بن هامان بن فرعون

لو تبي تبني مسيد في أفريقيا جان تبرعنا فيها
لو تبي تبني حسينية في بولندا قلنا ميخالف
تعال عطني بغمة أمك علشان أتزوج فيها
هلال ولد حجي رمضان

بستان..أهلك من حرتهم سموك بستان.. إلا منقاش خباز مو بستان
هلال ولد حجي رمضان

لالالا إحنا محافظون ما نقايس بالمحلات عيوني.. ميرسوو
مضاوي حرم بوصالح

البائع اللبناني: قديش عمر المحروسة؟
مضاوي: طعش سنة

أبي الويه مدور قمري مو طوالي.. الطوالي عندي وطايح بجبدي
حسين بن صامت

ها يا ولد القارص اتنحنح.. فيك بيضة؟
حسين بن صامت

إذا كان الكلام من فضة..فالسكوت من نعل
سعد بن صامت

شالديرة اللي ما ينعرف فيها الغني من الفقير
حطينا تلفونات بسياراتنا علشان نجابل أشغالنا
حطوا أريل فاضي
لبسنا شد.. حتى كرهونا بالشد
نلبس شد اصبعين يحطون شبر
حسين بن صامت

بس يا دكتور ديمقراطيتنا كبيرة وما تكفيها جربة أنا أقول لو تكون السلبيات في برجتنا (بركتنا) الديمقراطية
أبو حامي رئيس التحرير


والله لو بديرة ثانية حتى بالبواليع ما يشغلونك
منصور بوحظين

أيها الشعب التمام
أبو لهب ممثل الشعب


حوار خاطف من مسرحية ضحية بيت العز

هيفاء: يما أكرم خطبني
أم طبر: أكرم خطبج.. من منه؟
هيفاء: خطبني مني
أم طبر: عسى أخذتي راي عنبر


حوار هم خاطف من بساط الفقر

عبلة: يا عنتر
عنتر: نعم يا عبل
عبلة: عنتر
عنتر: نعم
عبلة: إيش تقول لو خطفوني
عنتر: ما أخلي في الدبدبة حي يشم الهوا
عبلة: أوصفني يا عنتر
عنتر: يا عبلو.. ما تحتويك الصفات لأن نور وجهك كنور كشافات مخفر في ليلة ظلماء..وفي الليلة الظلماء يفتقد البدر



مقولات خالد العبيد أيام رمضان

أنا اللي آكل الذهب أكااال .. همممممم

أنا الأقشر أنا
اللي تقظبه إيدي أعصره مثل الرمانة
عدل لو مو عدل

شركان شركون له أربع عيون
اللي أخزه يبتسم ويقول ممنون ممنون

أنا علقم مر ومدلقم

طباق طباق أحدق الفلوس حداق



ما أدري ليش كل ما أفتح الجرايد
وأقرا تصريح لناطق رسمي لإحدى الكتل البرلمانية
أو مسؤول حكومي رفيع المستوى أو مو رفيع المتسوى
أو مدير إدارة
أو رئيس جمعية أو نقابة
أو ممثلة حاطين لها صورة مضطجعة

لازم تطري على بالي مقولة من المقولات السابقة


إذا حسيت بشي يلعب في رأسك لا تظن إنها فكرة
فمؤكد إنه قمل

هناك 45 تعليقًا:

بالديسار يقول...

عزيزي
شكراً لأنك زرعت ابتسامة على وجهي من الصبح

sologa-bologa يقول...

بالديسار
تحياتي استاذي

أهم شي الابتسامة تكون دايمة

يمكن هالبوست مافيه مضمون واضح
على الأقل يذكرنا ببعض الأيام الخوالي


سؤالي لك

ليش مو فاتح التعليق على الرسائل المدريدية
؟؟

ودمت بحب وود

على نفسها جنت براقش يقول...

نسيت على المفيدى
صنقور أكال الارانب و الطيور

و اللى ينطبق على جماعتنا بتصريحاتهم

مى نو انجلش مى ذس
لوووول

ابداع كنت افكر فيهم من كم يوم

و
بلادكم حلوه حلوه
بس الوطن ماله مثيل
تذكرها؟؟؟؟

sologa-bologa يقول...

على نفسها جنت براقش

اذكرها شلون ما اذكرها
واذكر الكلمة السحرية مالته بعد

شط بط لا اتحرك ولا تنط

بلادنا حلوة بس لو الله يهدي أهلها شوي
ويفكرون بمنطق الدولة مو العشيرة
ولو بعد الله يفكنا من المخازز
وواحد يطالع الثاني


وأذكركم بعد

ألف باء تاء.. هذي الأحرف هجائية
جيم حاء خاء.. تعلم تقرا العربية

وبعد

توني وعيت
توا وعى
توني صحيت
توا صحى
توني دريت
إن العمل سر الحياة

من مسرحية البساط السحري


وفيه وايد وايد وايد
عيل أوكل مهمة الجزء الثاني عليكم
:)

ودمتم بحب وود

charisma يقول...

صباح الخيير
ههههههههههههههههه
موتنى ضحك سلوقاا والله صاااج
حتى انا واايد تطرى على بالى هالسوالف لما افتح الجرايد ولا اسمع تصاريح عبيطه

خلنى اضييف جم وحده

بس بالكلالام بس كلالام

غلالام ( لا تنسى غلالام )

واااى سلوقااا بدش اجتماع الحييين
بس اطلع راجعتلك

عندى وايد اضافات
لى انا هالسوالف
ههههههههههه
باى

7osen يقول...

ماشاءالله عليك والله حافظ حوارات واااايد

بس والله ضحكتني من الأعماق

الصراحة أكثر شي إبداع وتضحك
مقولات خالد المثلاج


يمكن لأن التصريحات والأقول ماهي ألا حوارات في أعمال درامية وكوميديا ليس ألا


عاد قمل

هههههههههههه



تحياتي لك عزيزي

مبدع وفنان دائماً وأبداً

Broke يقول...
أزال المؤلف هذا التعليق.
Broke يقول...

عجيب البوست

و الربط بينه و بين تصريحات المسؤولين

بطبعه و بوزعه على الأهل بالزوارة

بس أحلى شي مقولتي النعل و القمل و انت بكرامة ..

أما الأغنية الشعبية .. فذكرتني بأغنية ثانية كنا نغينها معاها بسفرة صيف 95

إسمها محيـربو تبو ... تعرفها ؟

charisma يقول...

بااك

وااى غلالام

لما سمعهم بسوون بنك جان يقول ويين العشره بالميه مال انا
جان يرد حسيين انشاءالله يسجل حصتك
رد غلالام
بس كلام
حسينوو لا مو بس كلام صج انا بشتريلك مركب
كل شى تمام
غلام بس بالكلام
حسينو يالله انثبر واسكت
واحنى اهنىى حالنا بس بالكلالام يا سلوقاا
نبلعها وننقهر

:/

احلى برييك هذا بوسع صدرى على الاخر

انا دايما اذكر لما حسينووه يصيير محامى حق المره العيوز على بيتها

لماا قاال ياا حضرة القاضى
القانوون فى امريكاا يعطيها البيت لها

والقانون فى نيودلهى يعطيها البيت لها
القانوون فى نيروبى يعطيها البيت لهاا

اذنننننن كيف لا يكوون القانووون فى ديراتها مااا يعطيها البيت لهااا
عااد هذا حجى يا حضرة القاضى

لوووووووووول

ايي والله هذا حجى عاد

ويرد حضره القاضى احنا ما علينا من البلدان الثانيه
مالنا شغل بحد احنا بالكوييييييت

يا سلام سلم
:))

اكثر مقطع يمر على
:))

وسامحنى انى خذيت راحتى هههه

بوست عجييب
تسلم ايدك

Tekana يقول...

مقتطفات جميله :)

sologa-bologa يقول...

charisma 1 & 2

:)

ياااي اجتماعات من الصبح
الله ياني أكره شي بالدنيا اسمه اجتماااع رسمي خصوصا من الصبح


أحلى شي بداية المشهد مع الروبيات اللي
اتحذف على راس سعد
سبعة ألف ثمانية ألف تسعة ألف
ولما قال لغلام
عشرة بالمية هذا حق غلام
بس إنت روح الهند وأنا ادزلها لك

ومن الشغلات الحلوة بالمحكمة
لما يقول حسينوه عن المحامي هديب بن ديرة

هذا جمبازي يا حضرة القاضي
وعن العيوز
شوفها يا حضرة القاضي شيخ الذبان امقعد

ولو بنقعد نعد ما نخلص


براءة .. براءة .. برااااااءة

-----------------------


7osen

عساها ضحكة من أعماق الأعماق
وبعد في بعض الشغلات مو حافظها قاعد أتحفظها
:)

وهم على قولة المثلاج واقحطة بحظنه
يقولك في جزر الأباطور اللي يطق شياب
يوكلونه أظافره ويحسنون حِـيّـاته.. وعليك باجي المشهد
:)

تحياتي حبيبي



----------------------


broke

محيربو مو من أغاني البنات قبل؟

وعن القمل الواحد لما تكون عنده فكرة
ويحاول يطبقها لكن ما يلقى أحد
يساعده ويتبنى هالفكرة
ففي هذي الحالة تصير الفكرة والقمل نفس الشي
الفكرة تموت مثل ما القملة يقصعونها عشان تموت


-------------------------


tekana

thank you
:)





ودام الجميع بحب وود

بالديسار يقول...

عزيزي سلوقا

ما في سبب
بس ما احس ان البوست محتاج تعليق
لا أكثر

شكراً لمتابعتك الدائمة

على فكرة ما في احد من جيل شبروح اللي ما ينتهي ولا يروح
للجيل الجديد هذه من مسلسل الشاطر حسن

Fahad Al Askr يقول...

تحية على التجميع

الله يا الفلاش باك، أنا صدعت الصراحة، وإنت بدعت

شنو إمكانية إنك تحطهم على شريط فيديو وتدزهم لنا بالعمارة؟

صبا يقول...

ابي فيلا
على طلبي
قسم غربي وقسم عربي
وابي سيارة ويه صبي
وابيك تعلمني
جم باليوم ربحك كاش

..
..
.
.

اليوم هده ليش الكوس هدونا
يش الكوس هدونا
رحنا المدراس وعند الباب ردونا
عند الباب ردونا

. ......
اشلون تمشى الاحمسه ...جذي جذي
.
.
.
اقرع مقيرع طاح بالطاسه صيح علا امه يبى قرقااااشه

.............

بدعة موتني من الضحك

AseeL يقول...

صاير شعبي :)

على طاري مقولة السيد اقحطة بن نافل... يعتمد على كواليتي الفحم وسعره

magnoonah يقول...

لوووووووووووول

ضحكتني ماكنت اعتقد انه فين ناس تحفظ سوالف المسرحيات والمسلسلات

بس والله بددعت واختيارات بمحلها
درب الزلق
على هامان يا فرعون
بساط الفقر

ما اعتقد الحين بتحصل شي تشوفه بمستوى الفن قبل

وترى على فكره الي اخترته ينطبق على حالنا لانه مسرحيات ومسلسلات قبل كانت هادفه ولها معنى والف قصد مو مثل الحين تفاهه وبس

يعطيك العافيه
:))

Aldenya يقول...

الله عليك يا سلوقا
فكرة فريدة بطرحها
ذكرتنا فيها بذيج الأيام
اللى كان فيها الفن قيم مقارنة
بــ فن هالأيام

وعلى طاري آخر مقولة بالبوست

مساع كنت قاعدة أحس بشي يفرفر براسي
قمت حطيت ايدي براسي
بشوف شنو هاللى يتمشى براسي
وعيني ما تشوف إلا قملة @@

عشان جذي أنا أصدق كلامك
:p~









" لايكون صدقت :> "

Nachla يقول...

خوش بوست
فعلا
الربط عندك خطير

شكرا

Purplecious يقول...
أزال المؤلف هذا التعليق.
Purplecious يقول...

لووووووووووووول

صبحك الله بالخير سلوقا

الله يوسع صدرك مثل ما وسعت صدورنا بهالبوست الحلوووو

الفكره تجنن و خوش بعد عرفنا أسامي الشخصيات كامله
يعني أنا أعرف قحطه و فضة بس مادري عن بن نافل
ههههههه

أعمال خالده ما تكفي المقتطفات منها

واااااي ودي اضيف مقاطع من رقيه و سبيكه بس شقول و شخلي

لما رقيه بالعرس تقول حق سبيكه: الجوووووتي ما يشولونه بالايديييين
يا بالحلج يا بالريوووول

سبيكه: مو هذا واسع

رقيه: امشي أهووووو

سبيكه: أطيييييح أطيييييييح


لوووووووووووووول

ray يقول...

الله

على مود هالشهر بالضبط

"من دونك حياتي ليل و انتي صراي"

ترى التشبيهات مو صج, عجيبة

عثماني يقول...

جمييييييل الربط

و جمييييل البوست

تسلم يا خوي

Ni3Na3aH يقول...

LOL..bada3t!

حمودي يقول...

ذكرتنا بالفن الجميل

ZoZOta يقول...

لووووووووووووووول

عجيب البوست

عجيب

ضحكت

وتذكرت

وغيرت مود

تحية غير لك انت بس يا سلوقا

sologa-bologa يقول...

بالديسار

من قال إن البوست مو محتاج تعليق
الإشادة بحد ذاتها تعليق يعطي دافع
وحتى النقد يعطي دافع

وإنت من المدونين المتميزن اللي أحرص على متابعة ابداعهم


شبروح أيام ما كان أحمد مساعد جسمه حلو
وهيفاء عبدالرحمن قبل لا تصير هيفاء عادل

وشرّق برّق لا اتحرك
:)



-------------------------------


فهد العسكر

الوعد وين.. عند باب العمارة
عند باب العمارة.. الوعد وين

تجميعهم يبيله شغل شغل


-----------------------


صبا

أحبج كثر ما يحب الطفل الطيور
أحبج كثر ما يحب القطو الصبور


والله ما قصرتي يا يمه فحصتي لي أمينة
البودي كله تفحصينه وتخلين المكينة


راح وقتي مع زمانه وأنا سلمت الأمانة
إنت الخير والبركة والماضي لا ما نتركه

والقائمة تطووول



-------------------



أسيييل

بالنهاية المهم فحم
وعلى خبري بالأسعار قبل الغلاء
خيشة الفحم الاندونيسي على ثلاث دنانير
وخشية الفحم الافريقي على ست دنانير

بس الأهم إن الحداد يعرف حق الفحم
مو يحط فحم الشواي حق الشيشة
وفحم الشيشة حق الشواي




ودمتم جميعا بحب وود

sologa-bologa يقول...

magnoonah

مو بس على هامان يا فرعون
ودرب الزلق وبساط الفقر

بعد فيه
عزوبي السالمية وبني صامت وضحية بيت العز
وحامي الديار وممثل الشعب وحرم سعادة الوزير وبيت بوصالح
وفرسان المناخ


وفاصل أغنية البارع من مسرحية
من سبق لبق
:)


-------------------------------

aldenya

أكيد ما صدقت لأنه شي يفرفر
واللي يفرفر أقوى من اللي يلعب
يعني شي أقوى القمل

:p

مسرحيات أول هادفة
لأنها مصطلحاتها مأخوذة من الواقع
مو مثل الحين يقولون إحنا نناقش الواقع
بالفن ماكو شي إسمه نناقش الواقع
لأنه ما راح يصير فن


---------------------------


nachla

لا بعد ما كملت باجي المقولات
في وايد وتنطبق على الواقع أكثر

الله يرحمك يا ملا مرشد الله يرحمك
اللي طايح له بسم الله
إي حط انجليزي حق هاليوم
ماكو
طايح له بسم الله
تقول قاعد يدرس هداهد


وعفوا
:)
--------------------------------


purplecious

هذي أسامي الشخصيات قبل
مو الحين
العاصي والراسي والراهي
راحت أسامي القبليين
نعيجة حميرة تويسة
عيل أسامي هالايام ندا سهى رشا
:)

واكملج بداية المشهد أول ما دشت رقية

رقية:الحين بتشوفون العروس
سبيكة: وصولوا المدعوات
رقية: اي وصلوا الله والمدعوات العرية عرية والعورة عورة
سبيكة: هذيل زميلات المهنة
رقية: الله والمهنة عاد

بعدها تدخل بحوار الجوتي
:)



------------------------


ray

والأحلى
أنا عايش على قدي
وعندي بيت وعندي بيت
وعندي موتر اصغير.. طاط طاط
ولا له لييت.. ولا له ليت
أنا بالليت ما لي شغل
اذا صار المغرب ابقبق
في وسط البيت ويمي نقل
أكسر وانتي يمج هالكثر برميت

:)


-----------------------



عثماني

الله يسلمك يا خوي
وما عليك زود يا ولد جبلة



------------------------


ni3na3ah

thank you
:)


---------------------------


حمودي

الفن الجميل أبد ما ينسي
لأنه جزء من العصر الجميل

وتسلم يا خوي


-----------------------


zozota

تحية مقبولة من أنثى المطر
:)

لازم شوية كوميديا
في واقعنا التراجيدي
اللي اسميه الميلودرامي





ودمتم جميعا بحب وود

tweety يقول...

لووووووووووووووووووووووول

امبي لأ مت من الضحك صراحة هالأقوال المأثورة أهم من ثلاث أرباع التصريحات اللي نقراها بالجرايد واللي نشوفها بالتلفاز

وتحياتي لعنبروه ( عنبن كابتن فنيق النمن )

p:

الوجد يقول...

كل عيد وانت بخير



وعساك من عواده

Mamloo7a Q8ia يقول...

عيدك مبارك
وعساك من عواده
البوست عجيييييب
مت من الضحك
عساك دوم مستانس

Purplecious يقول...


عيـــدك مبارك
و كل عام و أنت بخير

charisma يقول...

سلوقاا
عيدك مبارك وكل عام وانت بالف خير :)

Kasik Ya Watan يقول...

ممتع كالعادة يا سلوقا ...
وعيدك مبارك وكل عام وانت بخير

ZoZOta يقول...

عيدك مبارك صديقى الوجودي

وينعاد عليك بالعفو والعافية يارب

:)

لا تزعل ترى حبيت اطفرك شوي

AseeL يقول...

صاج.. الحداد لا كان عليمي يعفس الفحم

انزين والفحم الكويتي؟ P:
.
.
.
عيدك مبارك

78o8eYa يقول...

عيدك مبارك يا سلوقا
وعساك دووم من عواده
^_^

نفضت الغبره
..
وعيشتنا بماضي حلو

وأهم شي، الجملة الختامية

عجيبة الصراحة
;P

Shaima'a Alkandari يقول...

عاجبني البوست وايدوايد

مقتبسات جدا جميله

قلبت الاوراق القديمه وخليتها بحاضرنا مذكوره

:::


عيدك مبارك ياخوي وهونهاااااا

NewMe يقول...

آثرت الهرب من الحياة
اليوم
من كتاب
إلى النت
إلى التدوين
وياله من عالم
هربت من عالمي لعوالم غيري
عالمك
كان أكثرهم مرحا
كم استمتعت بهذا البوست
أما الربط بين المقولات والسياسة
مفاجأة أخرى أكتشفها
خبري ما تحب السياسة
دمت بحب
تحياتي

فراوله يقول...

مساالورد والجوري
عزيزي صاحب البوستات
الخطيره
صج الله يعطيك العافيه
قدرت ترسم الضحكه علي محيانا
:)
بس ودي اضيف عليك هالشغله
مقولة السيد حنظل بخالتي قماشة
لا شطيره لافطيره لابارد لاكاكاو
ههههههههههههه
المهم
عيدك مبارك وعساك من عواده
كل سنه يارب
دمت بدفء وعذوبه
ابدا
:)

sologa-bologa يقول...

tweety

إن شاء الله ضحكة دايمة

بس رجاء يرجى تصحيح المعلومة

عنبر قونجي فنيق النمن مو كابتن
:)




-------------------------


الوجد

عساكم من العايدين والفايزين


---------------------------



mamloo7a q8ia


عساكم من العايدين والفايزين

إن شاء الله الكل مستانس

يحب الضحك يحب الضحك
:)


------------------------------



purplecious

charisma


هي لا تنفع لا نيها ولا نوها

وأنتما بخير وصحة وسلامة
:)
عساكم من العايدين والفايزين


--------------------------


kasik ya watan

حيا الله من زارنا من بعد غيبة طويلة
:)

وانت والأهل بخير وصحة وسلامة

وعساكم من العايدين والفايزين


--------------------


zozota

وانتي بخير وصحة وسلامة
وعساكم من العايدين والفايزين
أزعل على شنو؟

بعدين في أحد يزعل من أنثى المطر
:)






ودمتم جميعا بحب وود

sologa-bologa يقول...

aseel

الفحم الكويتي عين السيح والله
ما كو مثله وما يتقدر بثمن
للي يعرف قيمته ويقدره

يولع من أول مرة
وإذا ولع ما يطفي

لكن الرك كله على الحداد
:)


وانتي من العايدين والفايزين


-------------------------------


78o8eya


عساكم من العايدين والفايزين

هذي الأعمال محفورة في صميم صميم الذاكرة ما تنسي أبد
ومثل ما يقولون باذاعة الكويت
الحاضر غرس الماضي
والمستقبل جني الحاضر

والله يستر من الحاضر

أما الجملة الختامية
فتحتاج زيبق أو غاز علشان تطير اللي بقى
من الدويبات اللي بالراس


----------------------------



shaima'a alkandari

عساكم من العايدين والفايزين
وانتي بخير وصحة وسلامة

هالأعمال دائما حاضرة وبكل وقت


والحمدلله مهونينها
وإن شاء الله تهون
:)




--------------------------


newme

سواء حبيت السياسة أو ما حبيتها
السياسة موجودة في كل تفاصيل حياتنا

ومضطرين نقرا الأخبار ونتابع

وشكرا على الإشادة
نحتاج شوية مرح وفرح
وعلى قولة خالد الشيخ

مرني مرة فرح بعيون الصغار

:)



--------------------------


الفراولة

وعساكم من العايدين والفايزين
والضاحكين والمبتسمين دائما
:)

وبما إني أخوكم الأكبر والأمثل حنظل
أقول الفلوس هي أمي وأبوي
ألف وأركض وألحقها وألوي
ألف وأركض وألحقها وألوي

:)

عاد صج مع هالبرد اللي سدحنا بالفراش
فترة العيد
نحتاج الى الدفء والعذوبة





ودمتم جميعا بحب وود

Selezya يقول...

هههههههه حلو هالمووود

تسلم
:)

الحب يقول...

شيل صورة كلب حط صورة خروف
حسين بن عاقول

لايني المفضل :)

خوش بوست... يسلمو

حلم جميل بوطن أفضل يقول...

منو مضطجع اليوم؟

هيا شعيبي؟

sologa-bologa يقول...

selezya

الله يسلمكم من كل شر
موود بارد شوي يتماشى مع برودة الطقس
:)



----------------------



الحب

الله يسلمكم من كل شر

شكرا جزيلا
ودرب الزلق كل حوار فيه
لازم يطلع لنا مقولة وحكمة
:)




-------------------------


حلم جميل بوطن أفضل

والله يا خوي ما قريت الجرايد اليوم





ودمتم جميعا بحب وود