05 نوفمبر 2006

مالي خلق

لأن الغياب عن التدوين قد ينسي الآخرين هذا الموقع

وبناء عليه سأدون.. وأقول


ما ادري ليش تحوشني هالحالة بين فترة وفترة
مالي خلق اسوي شي
لا مجهود عضلي ولا مجهود فكري
ولا مدحت ولا مصطفى

اوووووف

عاد كنت ناوي اكتب عن كتاب الدكتور خليفة الوقيان
الثقافة في الكويت .. بواكير واتجاهات

بصراحة كتاب ممتاز وحلو ويلخص الحياة الثقافية في الكويت

لكن شسوي مالي خلق

هل يا ترى هالحالة تحوش كل الناس
ولا بعض الناس
ولا ما تحوشني الا انا
!!!!

أفيدوني أفادكم الله



--------------------------------

لاني احب شعر الزهيري
راح اورد زهيريتين لشعراء كويتيين


ما اغفر انا اخطاك وحبك بالضمير انزاح
من حيث جرح ٍ بقلبي ما برا وانزاح
ونسيت ذاك الطرب واللعب وامزاح

انكرتني ليش شافعلت انا من بد
من بين الرفاقة ليه تحكي علي بد
الضرس لي من رقل من شلعته لابد
وانظر الى الغيم لي هب الشمال انزاح

للشاعر حمود الناصر البدر


الزهيرية الثانية

الروح كالسايبة والعقل راعيها
راعي بصيرة بعين الحق راعيها
يا ظالم النفس بالانصاف راعيها
لا تهين المدركة وتقول هذا قدر
رابي بمعزة ولا لي عالمذلة قدر
عندك دناعة نفس وتريد عز وقدر
النفس الدنية اطيح قدر راعيها

للشاعر عبداللطيف العبداللطيف السلطان


ودمتم

هناك 19 تعليقًا:

9ahba'a يقول...

اهني نفسي بحصولي على المدالية الذهبية لاحتلالي المركز الاول في التعليق

ثانيا هو شعور طبيعي ابشرك الكل يمر فيه
و بالعكس انا كثيرا ما احاول ان اقنع نفسي بان المدونة ليست التزام كي لا تتحول كتاباتي
الى كلام فاضي

ثالثا
الزهيريات واااااااااااااايد حلوين

اخيرا مبروك مرة ثانية لحصولي على الميدالية الذهبية

:)

ana_sokkarah يقول...

هي هي طبيعي إنشاءالله وسلامات (الرووووتين يختك يسوي جذيه) وعلى قولة (كيتي) الواحد يتنّح بهالحالة عموما إهي راح تمر عليك وايد فعوّد نفسك وحاول تاخذ نفس عميــــــــق لايتك هالحالة وغيّر شوي من وضعك إللي كنت عليه يعني إطلع شوي غيّر تمشى إقعد مع الأهل وشوف

والزهيريات قمة في روعة الكلمات تسلم على هالإختيار

sOulvOice يقول...

عندنا وعندك خير سلوقا


عيزانة اكتب حرف وكله مالي خلقققققق والله ان تييني حالات حتى مالي خلق افكر://


عموما الكتابة تحتاج موود معين

sOulvOice يقول...

قبل مدة وانا اتساءل عن سر


الفيل كبار يا نااااااااااس وبدى يكسر بيتي




واخيرااا عرفته :D

7osen يقول...

انا اعتقد انه على حسب نظرتك حق الكتابه بالمدونه

تقدر تقرر انك تقدر تكتب ولا لآ

يعني اذا انت تعتبر المدونه حق المواضيع العامه وطرح القضايا المهمه
فا اكيد هذا الشي يحتاج الى مزاج معين

لكن اذا تعتبرها حق التعبير عن احساسك
وعن ما يدور في داخلك
بأمكانك انك تكتب كل يوم0

موفق

Cr8ivia يقول...

شعور ينتاب كل منا من وقت لاخر

مابي اسوي اي شي
لاافكر و لا اشتغل
بس ابي اعيش يومي يوزليس ! و لا اي شي اسويه حوسة و بس

sologa-bologa يقول...

صهباء
نبارك لكم حصولكم على المرتبة الأولى
مو بس بالتعليق حتى بالتدوين
:)
بس على فكرة انا ماعندي مداليات ذهبية
انا مثل حكومتنا ما اعطي الا شهادات تقدير
;p

صح المدونة مو التزام
لكنها مجال لتحريك العقل والفكر ومشاركة الاخرين

ودمتم بعزة وود


كيتي
المشكلة اذا حاشتني هالحالة
يتراكم الشغل والالتزام
لأن الواحد مو بكيفه يأخر الشغل
واللي يصير ان اللي المفروض اسويه بيومين
ياخذ مني اسبوعين
حالة قشرة

هذا انا احاول اتلاحق عمري
وآخذ مضادات نعنشية ضد حالة مالي خلق

ودمتم بسعادة


ana_sokkarah
حياكم الله في مدونتنا الصغيرة
أنا كل يوم أغير وضعي
كل يوم أطلع وأروح وأرجع
بس هالحالة لازم تحوشني مرة كل شهر ونص
حالة مزمنة
بس تعودت عليها
وأشكر لكم نصيحتكم الغالية

ودمتم برخاء

soulvoice
اي والله الكتابة تحتاج موووود معين
على فكرة
الفيل كبر يا ناس
اغنية في مسرحية طماشة
وبس
:P

ودمتم برغد وبحبوحة


7osen
حياك الله
ونشكر لكم مروركم وتعليقكم في مدونتنا

فكرة المدونة بالنسبة لي اشراك الاخرين ومشاركتهم
سواء كانت قضية عامة او تعبير عن احساس شخصي

المهم المشاركة

ودمتم بعزة وحبور


cr8ivia
صحيح
اهم شي كل شي نسويه يكون له معنى
و
creative

ومتطور

اشكر لكم مروركم وتعليقكم

ودمتم بهناء ودعة

Fuzzy يقول...

متكلش لا سمك ولا بيض

اي هالحالة تحوش أغلب الناس بس عاد لا تحرمنا من متعة قراءة كتاباتك

قواك الله

tweety يقول...

اي هالحالة اتصير فينا كلنا بس الفرق انت مدحت ومصطفى
واحنا فكرية وشوقية وتفيدة

عادة تكون بسبب الاحباط والاكتئاب فيشعر الانسان بعدم الرغبة بفعل شيء لانعدام الحافز او للشعور برتابة الروتين والملل وعدم القدرة على احداث تغيير
لا انا اسم الله علي شهرين وافتح لي عيادة واشتغل معالجة نفسية
:p

انا احب زهيريات عبدالرحمن الضويحي

سلوقا اذا مر يوم مالك خلق تكتب بس قوللي وانا اكتب بدالك واطرشلك الموضوع اللي تبيه
لوووووول
جدر امموش مو بوست

sologa-bologa يقول...

fuzzy

أصلي كنت نايم وسحلية عدت من فوق رقبتي
:)

حبيبي اشكرك


تويتي

عيل انا اول واحد بيتعالج في هالعيادة
وي اسم الله علي ما ادري اشفيني
:p

اوييلالالالالاه
امموش
بس شرط مع ربيان يابس مو طري
مع أجاااار
وقلاص لبن خاااااااثر
وحدة بوحدة

اما الضويحي البوست الياي احط له زهيرية

حاضرييين

وأورد بيتا واحدا من احدى زهيرياته

أدعج عنج غض بض امقرمزات اشفاه
واكملها بالبوست

:p

ودمتم اعزاء سالمين

bo9ali7 يقول...

نفس الوضع عندي..

barrak يقول...

عندنا وعندك خير
هذا يسمونه مرض الرباده والفصلات

lawyer يقول...

الي فيك شي طبيعي

تلاقي نفس كلام عندي

و عند ريما
و عند كراتيفيا

نص البلوجر حايشتهم هالحاله

Unknown يقول...

تصدق انا اتوقع بسبب تغير الجو اجسامنا ما خذت فجأة على لفحة الهوا البارد يبيلنا جم يوم ونكون فرش
استمتع عزيزى

9ahba'a يقول...

nozolan 3nd raghbitik i published my new post enjoy

sologa-bologa يقول...

بوصالح

براك

ماأقول إلا الله يعدي فترة هالربادة على خير

sologa-bologa يقول...

المستبصر
حياك الله حبيبي

أول شي احب اقوله
ان اول تدوين لك كان نفس يوم عيد ميلادي المجيد
:)

ثانيا
الضرس لي من رقل من شلعته لابد
موجودة بالزهيرية الأولى .. ما اغفر انا خطاك
وهي للشاعر الكويتي
حمود البدر
وهذي الزهيرية تلقاها في أغلب أغاني فنون البحر

ثالثا
المدونة بالنسبة لي هروب من السياسة
لأن اذا بقول رأي سياسي أحب أقوله باسمي
الحقيقي مو من خلال مدونة واسم وهمي

وأشكر لك مرورك الجميل
وبانتظار موضوعك الأول


laywer
لاحظت هالشي
حاولت اعلق في مدونتكم لكن ما ادري شاللي
صار التعليق ما نزل

يا خوفي ان الجو فيه فيروس اسمه
مالي خلق

ياللا كلها ايام ونرجع الى سابق عهدنا

أسعدني مروركم



مشاري
يا مرحبا بك

عاد هالايام الجو رهييييب
وينعنش

أشكر لك مساهمتك


صهباء
نشكر لكم تواضعكم
وستجدون التعليق على ما كتبتم

:)

ودمتم بسعادة وحبور

kuwaitia يقول...

لا عادي انا وايد تحوشنى

والزهيريات حلوه وايد

sologa-bologa يقول...

المستبصر

ولووو
أتمنى تكون الإجابة واضحة
:)

ودمت عزيزا


كويتية
الله يعينا على هالحالة
تراها حالة ماصخة

نشكر لكم هذه الزيارة العذبة
ومروركم وتعليقكم المهذب

ودمتم بصحة موفورة