20 سبتمبر 2006

ليش مو لابس قحفية

سمعت نكتة منذ فترة اعجبتني كثيرا ،، وهي من النكات التي أضحك عليها
وفي الوقت ذاته أحسست أنها لها مضامين اجتماعية واقتصادية ودولية
وإليكم هذه النكتة
يحكى أن ..بما انها نكتة لازم تنكتب باللهجة الكويتية وماله داعي تنظير واستعراض لغوي
يقولون كان ياما كان ويكون وسوف يكون
كان في نمر ملعوز شاذي (قرد) كل ما يشوفه يطقه (يضربه) على راسهويقول له "ليش مو لابس قحفية"
وكل يوم على هالمنوال
ويوم من الايام الشاذي مل من حركات النمر كل يطقه ويقول له ليش مو لابس قحفية
وقرر يشتكي عند ملك الغابة الاسد .. وراح للملك وقال له
يا ملك الزمان .. يا سيد العدل والاحسان بصراحة النمر اذاني واهاني وانا ياي اشتكي
فقال الاسد
شنو شكوتك يا شاذي
قال الشاذي
بصراحة النمر اذاني كل ما يشوفني يطقني على راسي ويقول ليش مو لابس قحفية
فقال له الاسد
خلاص ما يصير خاطرك الا طيب يا شاذي انت روح البيت وانا اقابل النمر واقوله ما يطقك
وأمر الاسد باستدعاء النمر .. ولما جاء النمر أدى التحية بكل احترام وقال
انا تحت أمرك يا مولاي الاسد
فقال الاسد
انت ليش تطق الشاذي على راسه وتقوله ليش مو لابس قحفية
فقال النمر
تبي الصج يا مولاي انا منبطة جبدي من الشاذي وودي اطقه كل ما اشوفه لكن ما القى عذر علشان اطقه فأقوله ليش مو لابس قحفية
فقال الاسد
انزين اذا تبي تطق الشاذي طلع لك عذر يديد مو كل يوم تطقه على نفس العذر مثلا قول له روح جيب لي تفاحة واذا جاء الشاذي وياب لك تفاحة حمرا طقه وقول له انا ما ابي تفاحة حمرا ابي تفاحة خضرا .. شغل مخك عاد
استانس النمر من خطة الاسد وقرر ينفذها
ولما شاف الشاذي ناداه من بعيد وقال له
تعال تعال .. انا مشتهي تفاحة روح جيب لي تفاحة بسرعة ولا تتاخر
ابتعد الشاذي خطوتين ورجع للنمر وقال له
تبي تفاحة حمرا ولا خضرا
تبلعم النمر وما عرف شيقول جان يطقه على راسه ويقوله

ليش مو لابس قحفية

انتهت

سؤال..
حاليا انا لابس قحفية.. لكن هل يا ترى راح يأتيني أحد ويقول لي
ليش لابس قحفية !!

هناك 14 تعليقًا:

9ahba'a يقول...

قصة واقعية تحدث بشكل يومي
في مجتمعنا
اللي يدورون الزلة وايد
ارضاء الناس غاية لا تدرك
فهناك من يستخدمها لاغراض مشبوهةللتخلص من شخص في موقع معين لان مو ياي على هواه ولا امشيله شغله

ليش لابس قحفيه؟
قصص كثيرة للنمر و القرد و الملك
في الكويت

موضوع يستاهل نقاش

الكويتي الحر يقول...

ها ها ها حلوة

والمضمون احلى

Fuzzy يقول...

ييبلي تفاحه هاهاها

tweety يقول...

لوووووول حلوة
اي اتوقع بيقولون لك ليش لابس
مبارك عليك الشهر

NewMe يقول...

طول ما انت مغطي راسك
ما بيسالونك ليش
بس لا شتيت عن السرب
وصرت تمشي عكس التيار
بتلاقي كثيرين
ودهم ايلبسونك القحفيه
طيب غصب
قصة واقعية
في غابة البشر
دمت بود
تحياتي

sologa-bologa يقول...

اسف اني تاخرت بالرد عليكم
بس شنسوي كل عام وانتو بخير ومبارك عليكم الشهر
لهينا شوي

صهباء
المواضيع اللي تحتاج نقاش وايد وكثيرة
بس اهم شي ان احنا نلبس قحفية




الكويتي الحر
بالنهاية تبقى نكتة



fuzzy
اشرايك بتفاحة خضرا مفيدة وحق الرجيم زينة
لاني بصراحة مابي اسألك اذا تبيها حمرا او خضرا


tweety
كل عام وانتم بخير
شنسوي لازم نلبس قحفية



newme
والله احب امشي مع التيار
بس مرات التيار يكون قوي ما اقدر عليه



ودمتم

neelaah يقول...

اوووووووووووه
هذي من اعظم النكت

لها بعد اجتماعي و فلسفي
خطير

و راح تلاقي روحك من غير ما تدري تستخدم مقوله
شحقه مو لابس قحفيه
بحياتك اليوميه
كمثل

يعني مديرك مستعسر
المدام مشينه
الوالد او الوالده معصبين

انا سامعتها يمكن من 15 سنه
بس مازلت استعملها

Fuzzy يقول...

هاهاها ابي تفاحة نصها أخضر ونصها أحمر
:)

ومبارك عليك الشهر

bo9ali7 يقول...

LOL
والله لا تستبعد اي شي..كل شي جايز

luloo يقول...

حتى احنا كله يقولون لنا ليش مو لابسة حجاب:)

mishari يقول...

اذا قحفية يعنى الوقع سلبى
البس طاقية وغط راسك :)

مثل ما قالت نيلة تلقى كلمة ليش مو لابس قحفية تلزق بلسانك على اى موقف مرتبط

خوش موضوع تحياتى

sologa-bologa يقول...

نيلة
فعلا هالمقولة لازقة بلساني لان الوضع مثل ما قلتي ووصفتي

تحياتي


fuzzy
نصها احمر ونصها اخضر هذي تفاحة بيضاء الثلج

علينا وعليك


بوصالح
ايها الغائب الحاضر
الحمد لله على السلامة
من طول الغيبات ياب الغنايم
عسى ما شر شالغيبة ؟؟
مبارك عليك اللي بقى من الشهر

luloo
المفروض تردين عليهم
ما ينفع بطولة (مالت اهل الامارات) اللي جنها برقع
علشان باجر يقولون
ليش مو لابسة بطولة


مشاري
تحياتي لك

عاد انا ما اواطن شي اسمه طاقية
احس انها تقمت على الراس
احنا ناقصين قمتة



وتحياتي للجميع

bo9ali7 يقول...

سى ما شر يبا..وين الغيبة..اشتقنا

غير معرف يقول...

情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品