يا بلد لا تونّ

يا بلد لا تونّ من جرحك يوم وتعاني
ونّتك تشق الصّدر ونوحك أشجاني
صدقني يا بلد .. سحابة صيف وتمر
صدقني يا بلد .. بتشوف اللي يسر
وعيالك يا بلد .. إيدهم وحدة
وقت الشدايد
الفقير ويّا الغني ..الحضري والبدوي
والشيعي والسني
كلهم تحت قايد
قايدهم الحب والوفا لك يا بلد
حشا محد يزايد
يا بلد لا تونّ .. ونّتك نار بالجوف
مو على غيرك أخاف ويملاني الخوف
يمكن عاصفة مرت لكن مسيرها تطوف
ونّتك بألف ونّـة في قلبي
إنت حياتي ودنيتي وكل حبي
على سيفك يا بلد أنشد بموّالي
وفي برك يا بلد أحط ترحالي
وأغني مع نسمتك يا حالك وحالي
يا بلد لا تونّ
الجرح لابد ينبرى مهما غزر
في رمل صحراك الدوا وسيف البحر
وعيالك تحوفك يا بلد دب الدهر
يا بلد
العين ما ترمش اذا ما تشوفك
والقلب خفقته صفقة في كفوفك
والصوت يغني بوفا "لي بلد حَسين".. نعم
يزهى بطلته "يعجب الناظرين" .. نعم
في وصاله أحلى وصل
غصبٍ على كل الحاسدين .. وأحلى نغم
يا بلد لا تونّ
ما عاد للونّـة في ربوعك مكان
عيالك حُماتك على طول الزمان
تذكر يا بلد ذاك الزمان !! آه
كنا نتجمع في الشتا على الدوة
أنا وإنت والأهل
نتسامر ونتحاور حشا
ما حسينا بكدر أبد
ولا حسينا بملل
كانت الدنيا حولنا صغيرة
كانت الفرحة فيها كبيرة
كنا نصرخ كلنا بفرح
يا زين هالوطن يا حلو هالديرة
صدقني يا بلد
هالأيام لابد تعود
ونعيش ليالي السعود
الصغير فينا ويّا العود
بس الأهم يا بلد .. لا تونّ
لا تونّ.. لا تونّ